Uppi eru áform um að koma upp sorporkustöð með orkuvinnslu (sorporkuveri) á urðunarstaðnum á Strönd í Rangárþingi ytra. Stöðin verður sett upp í samvinnu Sorpstöðvar Rangárvallasýslu bs. (hér eftir nefnd SOR) og fleiri aðila í samræmi við samstarfssamning sem gerður verður. Uppsett afl stöðvarinnar verður 1MW til að byrja með og er áætlað að orkan verði framleidd með brennslu á allt að 2.500-3.000 tonnum af blönduðum úrgangi á ári miðað við að brennslugildi úrgangsins sé 11 til 12 MJ/kg að jafnaði. Gert er ráð fyrir að fyrsti áfangi stöðvarinnar taki til starfa í mars 2027 og að orkuframleiðsla þess áfanga jafngildi 8.000 MWh af heitu vatni á ári. Veitur, sem reka hitaveitu á svæðinu, hafa lýst áhuga á kaupum á orkunni og hyggjast nota hana til að hækka hitastig jarðhitavatns og bæta þannig nýtingu takmarkaðra jarðhitaauðlinda á svæðinu.
Environice aðstoðaði SOR við umhverfismat sorporkuversins. Matsáætlun lá frammi til kynningar sumarið 2025 og umhverfimatsskýrsla lá frammi frá 19. nóvember 2025 til 2. janúar 2026. Á þeim tíma gafst almenningi kostur á að kynna sér efni skýrslunnar og koma með athugasemdir. Skipulagsstofnun vinnur nú (janúar 2026) að áliti sínu um umhverfismat framkvæmdarinnar, byggt á umhverfismatsskýrslunni, framkomnum umsögnum og öðrum fyrirliggjandi gögnum. Í álitinu mun koma fram rökstudd niðurstaða stofnunarinnar um umhverfismat framkvæmdarinnar og, eftir því sem við á, skilyrði um mótvægisaðgerðir og vöktun. Álit Skipulagsstofnunar mun væntanlega liggja fyrir í febrúar 2026. Það verður þá kynnt á áberandi hátt og þar með lýkur umhverfismatsferlinu.
Verkkaupi: Sorpstöð Rangárvallsýslu bs.
Tímarammi: Febrúar 2025 – febrúar 2026
Tengd útgáfa: Umhverfismatsskýrsla
