Í árslok 2023 samdi Environice við Samtök sveitarfélaga og atvinnuþróunar á Norðurlandi eystra (SSNE) um útreikning á kolefnisspori Norðurlands eystra, en samtökin höfðu þá fengið það hlutverk að leggja til svæðisáætlun í loftlagsmálum fyrir landshlutann í samræmi við sameiginlegt markmið aðildarsveitarfélaganna. Hlutverk Environice samkvæmt samningnum var m.a. að ráðleggja um aðferðafræði við útreikning á kolefnisspori landshlutans, afla tölulegra upplýsinga og aðstoða við framsetningu og túlkun niðurstaðna.
Verkefnið var í aðalatriðum sambærilegt fyrri verkefnum Environice á þessu sviði, en á árunum 2019-2022 vann Environice sambærilega útreikninga á kolefnisspori Norðurlands vestra, Suðurlands, Vesturlands og höfuðborgarsvæðisins, í öllum tilvikum í samstarfi við landshlutasamtök sveitarfélaga á viðkomandi svæðum. Samhliða verkefninu fyrir SSNE var einnig unnið að útreikningum á kolefnisspori Austurlands. en Austurbrú leiddi það verkefni fyrir hönd sveitarfélaga á svæðinu.
Meginniðurstaða skýrslunnar um kolefnisspor Norðurlands eystra var að samanlagt kolefnisspor svæðisins árið 2022 hafi numið hafi numið 1.033.654 tonnum koldíoxíðsígilda (rúm 33 tonn á íbúa) og að þar af hafi 622.891 tonn (um 60%) verið losun vegna landnotkunar, 152.011 tonn (um 15%) verið losun frá stóriðju og 258.752 tonn (um 25%) verið samfélagslosun. Heildarlosunin á hvern íbúa er þannig nálægt því sem gengur og gerist í öðrum landshlutum. Losun vegna olíunotkunar fiskiskipa og farartækja á landi er talsvert yfir landsmeðaltali, enda mikil útgerða á svæðinu og flutningsvegalengdir fremur miklar. Á móti kemur að losun frá búfé og landnotkun er minni en í flestum öðrum landshlutum utan höfuðborgarsvæðisins, sem skýrist af því að tiltölulega stór hluti íbúa á Norðurlandi eystra býr í þéttbýli.
Verkkaupi: Samtök sveitarfélaga og atvinnuþróunar á Norðurlandi eystra (SSNE)
Tímarammi: Samningur undirritaður 21. nóvember 2023. Verklok í júní 2024.
Tengd útgáfa: Kolefnisspor Norðurlands eystra
