Environice annast stjórn verkefnis sem gengur út á að útbúa verkfærakistu fyrir sveitarfélög sem vinna að stefnumótun í loftslagsmálum, sem hýst verður á vefsíðunni loftslagsstefna.is.

Verkfærakistan skiptist annars vegar í opinn ytri vef sem m.a. mun innihalda almennar upplýsingar um loftslagsstefnur sveitarfélaga, skyldur sveitarfélaga skv. lögum um loftslagsmál, hugmyndir að aðgerðum sem sveitarfélög geta ráðist í til að minnka losun frá rekstri (hugmyndabanka), hlekki á loftslagsstefnur sveitarfélaga, fræðslu- og kynningarefni, nýtt fræðsluefni sem verður útbúið fyrir þetta verkefni, hlekki á viðeigandi fræðsluefni á öðrum vefsíðum – og hins vegar í innri vef sem verður einungis aðgengilegur starfsmönnum sveitarfélaga og hefur að geyma skilgreindar afurðir verkefnisins, m.a. losunarreikni sniðinn að fjölbreyttum rekstri sveitarfélaga, sniðmát að loftslagsstefnu og aðgerðaáætlun fyrir sveitarfélög, svo og aðgerðabanka. Umhverfisstofnun mun hýsa vefinn og fara með umsjón hans að verkefni loknu, í samráði við Samband íslenskra sveitarfélaga sem heldur utan um gerð verkfærakistunnar.

Undirbúningur að gerð verkfærakistunnar hófst í september 2020, en samningur milli Sambands íslenskra sveitarfélaga og Environice um verkefnisstjórnina var undirritaður í byrjun desember. Samkvæmt samningnum annast Environice daglega umsjón og reglulegt samráð við skilgreinda aðila að verkefninu, þ.e. verkkaupa, Umhverfisstofnun, stýrihóp verkefnisins, samstarfsvettvang
sveitarfélaganna um loftslagsmál og heimsmarkmið, vinnuhóp samstarfsvettvangsins og Landvernd. Auk þess sér Environice um val, ráðningu og samskipti við vefhönnuði, sem útbúa ytri og innri vef verkefnisins í nánu samráði við Environice og Umhverfisstofnun. Þá mun Environice útbúa losunarreikni fyrir losun gróðurhúsalofttegunda í rekstri sveitarfélaga og stýra aðlögun þess efnis sem Umhverfisstofnun hefur útbúið fyrir ríkisaðila undir merkjum verkefnisins Græn skref, þannig að
það henti sveitarfélögum.

Gert er ráð fyrir að verkefninu ljúki með formlegri opnun verkfærakistunnar í maí 2021.

Viðskiptavinur: Samband íslenskra sveitarfélaga

Verklok: Maí 2021

Tengd útgáfa: